未夠班的小股災

今星期環球爆發小股災，但只要你的股齡長一點，就會明白真正的災難肯定不會咁小兒科，現時只是大家開了一個極長的歡樂派對後，翌日醒來感受到的宿醉及頭痛欲裂。風平浪靜了太久，大家對於忽然要走火警，的確係會手足無措，幸好今年的派對食咗足夠嘅野打底，即使嘔晒出黎，都唔會太傷，但市場的確需要點時間去重建信心，不要旨望短期會再有新高喇。

風平浪靜，訓係度收錢，的確係神級操作，但今星期迎來久違的波動，卻令不少靠平靜而賺錢的人輸身家，相信大家對XIV事件都略有所聞，有興趣的可以趁這個周末google一下。VIX是反映市場對標普指數的波動預期，市場人士稱之為恐慌指數，每次有大大獲嘅事，VIX一定急升，而XIV就是一個沽空VIX的Exchange-Traded Note，簡單啲講，波動愈細你就愈賺錢。過去5天VIX由13點升至50點，可想而知你沽空咗佢係幾咁大件事。

我們簡稱這些行為叫沽Vol(引伸波幅)，並不是新鮮的事物，自有期權市場便有，輪商每天沽輪出街，就是沽Vol，所以如果波動在突然發生而未能對沖，係會輸爆的，當然由於輪場的Vol極高，呢頭沽完俾你，佢在專業市場已可補番，你補唔足而最後出事，只係閣下的道行未夠而已。

亦不要以為這些沽Vol是專業的事，現時很多散戶都會去沽認沽期權，當做「收息」，只要股價唔急跌，每個月收期權金的確好爽，亦即係前文所講的訓係度收錢，由於長期唔出事，個個都走去沽Vol，供求的關係，令主要藍籌的引伸波幅持續向下，「收息」愈來愈奀，咁好自然就將認沽期權的行使價搬近啲，又或者做大啲，務求令個「息」大啲，最弊個樣就係不知不覺中做大咗，明明自己的能力只可以接兩萬股匯豐(0005)，卻去沽四萬股認沽期權，冇事當然笑騎騎啦，但有乜風吹草動，就要人生交叉點，決定斬倉定係死守接貨，經驗告訴青冰，到時要逼住你斬，損失的可能是一兩年訓係度收的輕鬆錢。

溫馨提示番，恆指波幅指數(VHSI)，早幾日見過29點，過去一年多大部分時間是低於20點，2015年大時代爆煲，VHSI見過46點，2011年美國債務評級被downgrade引發的股災，VHSI高見59點，2008年雷曼事件，VHSI是104點，所以如果要見真正的股災，這次還未夠班呢。

Fb個人專頁 http://www.fb.com/chingbing888